ಐಸಲೇ ಕುಮಾರವ್ಯಾಸ !! - ೧೨೬ -

ಐಸಲೇ ಕುಮಾರವ್ಯಾಸ !!                  -  ೧೨೬  -

ಉದ್ಯೋಗ ಪ ೯-೨೧

‘ಯಮಜ ನಿನಗೊಳ್ಳಿದನು, ಪಾರ್ಥನ ಮಮತೆ ನಿನ್ನಲಿ ಹಿರಿದು

ಭೀಮನ ತಮದ ನುಡಿ ಹಿಂಗಿದವು

ನಕುಲನು ನಿನ್ನೊಳೆರಡರಿಯ..,

ತಮತಮಗೆ ತಮ್ಮೈವರೂ ನಿನ್ನಯ

ವಿಮಲ ವಚನವ ಹಾರಿಹರು

ಉಭ್ರಮಿತತನವನು ಮಾಡದಿರು ಸೋದರರ ಸಲಹೆಂದ..,’

ಸಂಧಿ ಅಥವಾ ಸಂಧಾನ ಎಂದರೆ ಪರಸ್ಪರ ಅಭಿಪ್ರಾಯ ವಿನಿಮಯ.ಒಮ್ಮತಕ್ಕೆ ಬರುವ ಯತ್ನ.ಎದುರಿನ ವ್ಯಕ್ತಿಗೆ ಸಹಾ ಅವಕಾಶ.ಸಾಮ, ದಾನ, ಭೇದ ತಂತ್ರಗಳ ಪ್ರಯೋಗ. ಪಾಂಡವರ ಪ್ರತಿನಿಧಿಯಾದ ಹರಿ ಈ ಎಲ್ಲಾ ಮಾರ್ಗಗಳನ್ನೂ ದುರ್ಯೋಧನನಿಗೆ ತೆರೆದಿಡುತ್ತಾನೆ.ಎಲ್ಲ ಅವಕಾಶಗಳನ್ನೂ ಮುಕ್ತವಾಗಿಡುತ್ತಾನೆ. ಎಲ್ಲ ವ್ಯರ್ಥವಾದಮೇಲೆ ತಾನೇ ದಂಡ ಅಥವಾ ಯುದ್ಧ? ಜನಸಾಮಾನ್ಯರ ಆಡುಮಾತಿನಲ್ಲೇ ಇರುವ ಹರಿಯ ಸಲಹೆಯಲ್ಲಿ ವಿವೇಕ ಮತ್ತು ತಂತ್ರ ಎರಡೂ ಇವೆಃ 

‘ದುರ್ಯೋಧನಾ, ಧರ್ಮರಾಯ ನಿನಗೆ ಒಳ್ಳೆಯವನೇ ತಾನೆ?ಪಾರ್ಥನ ಮೇಲೂ ನಿನಗೆ ಮಮತೆ ಇದ್ದೇಇದೆ. ಇನ್ನು ಭೀಮ!(ನಿನ್ನ ಸಮಸ್ಯೆ). ಅವನ  ದುಡುಕಿನ, ಒರಟು ಮಾತುಗಳು ಸಹಾ ಈಗಿಲ್ಲ.ನಕುಲನೋ ನಿನ್ನಲ್ಲಿ ಎರಡರಿಯದ ಮುಗ್ಧ. ಒಟ್ಟಾರೆ ಐದು ಜನರೂ ನಿನ್ನಿಂದ ಒಳ್ಳೆಯ ನಿರ್ಧಾರವನ್ನು ಅಪೇಕ್ಷಿಸಿ ನನ್ನನ್ನು ಕಳಿಸಿದ್ದಾರೆ. ನೀನು ಉದ್ರಿಕ್ತನಾಗಿ ಮಾತಾಡಬೇಡ. ಅವರು ಸಹಾ ನಿನ್ನ ತಮ್ಮಂದಿರು ತಾನೇ? ಅವರನ್ನು ರಕ್ಷಿಸಬೇಕಾದವನು ನೀನು .ಅವರನ್ನೂ ಬಾಳಿಸು’

ತಾನು ಪಕ್ಷ ವಹಿಸಿ ಬಂದಿರುವ ಪಾಂಡವರ ಪರವಾಗಿ ವಸ್ತುಸ್ಥಿತಿಯನ್ನು ನಿರೂಪಿಸಿ ದುರ್ಯೋಧನನಿಗೆ ತಿಳಿಯ ಹೇಳುತ್ತಿರುವ ರೀತಿ ಇದು. ಸಾಮೋಪಾಯ. ದುರ್ಯೋಧನನಿಗೆ ಎಲ್ಲರ ಮೇಲೂ ದ್ವೇಷವೇನಿಲ್ಲವಲ್ಲ. ನಾಲ್ವರ ಮೇಲೆ ಇರಬಹುದಾದ ಮಮತೆಯನ್ನು ಒರೆಗೆ ಹಚ್ಚುತ್ತಿದ್ದಾನೆ. ದುರ್ಯೋಧನ ಬಗ್ಗಿದರೆ ತಪ್ಪೇನು?

ಕುಮಾರವ್ಯಾಸ ಪ್ರತಿಷ್ಠಾನ                                             ೩೧/೮/೨೦೧೮